Snertiþörfin er ein af grunnþörfum mannsins

Flestir eru sammála um mikilvægi snertingar fyrir ungbörn. Margar rannsóknir hafa sýnt fram á að ef ungbörn fá ekki snertingu þá getur það haft áhrif á tilfinningalegan þroska þeirra. Þegar við verðum fullorðin höfum við áfram sterka þörf fyrir að finna að einhver er til staðar sem snertir okkur og sem okkur langar til að snerta.

Auðveldara að snerta börn
Flestir eiga auðveldara með að snerta börn en fullorðna. Börn vekja hjá okkur þessa þörf fyrir að snerta aðra manneskju og þau eru líka opnari fyrir henni en fullorðnir. Það er mjög eðlilegt en ef við getum ekki sótt snertingu til annarra fullorðinna erum við að leggja það á börnin að bera okkar eigin þörf fyrir snertingu og það getur verið þungt fyrir barn að bera ábyrgð á þörfum fullorðinnar manneskju á þennan hátt. Börn þurfa snertingu á sínum eigin forsendum.

Óttinn við höfnun
Stundum þurfum við að telja í okkur kjark til að biðja aðra fullorðna manneskju um eitthvað sem við viljum að hún geri fyrir okkur. Hún gæti sagt nei og þá stöndum við berskjölduð frammi fyrir henni og finnst við alveg nakin. En þetta er áhætta sem fylgir því að verða fullorðinn.

Ekki snertivæn menning
Af einhverjum ástæðum er okkar menning ekki mjög snertivæn. Einhvers staðar á leiðinni frá því að vera ungbörn og yfir í að verða fullorðið fólk þróum við með okkur ákveðna snertifælni og hættum að geta tekið við og veitt snertingu bara fyrir snertinguna sjálfa. Snerting verður eitthvað sem tilheyrir bara ákveðnum kringumstæðum. Við höfum tilhneigingu til að tengja saman kynlíf og snertingu og rugla saman þörfinni fyrir snertingu og kynlífsþörf. Þörfin fyrir snertingu er hluti af grunnþörfum mannsins eins og við verðum svöng og þyrst.

Nudd og snerting
Nudd er eitt elsta meðferðarform sem til er og gott nudd veitir okkur þessa nærandi snertingu sem við öll þurfum. Hlutverk nuddarans er fyrst og fremst að kenna okkur að hlusta á líkamann, hjálpa okkur að taka eftir hvar við geymum spennu með því að beina athygli okkar að henni. Þetta tekur okkur út úr huganum um stund og það eitt og sér veitir okkur djúpa hvíld.

Við deyfum okkur upp til að flýja spennuna
Þegar við erum búin að safna upp mikilli spennu eða vöðvabólgu eða þreytu í vöðvana þá hættir okkur til að taka athyglina í burtu frá því svæði í líkamanum og deyfa það niður með því að halda niðri í okkur andanum eða anda mjög grunnt. En gallinn við þessa "flóttaleið" er að spennan er þarna enn og hún heldur áfram að safnast upp.

Líkaminn verður óhamingjusamur undir spennuálagi
Besta leiðin til að forðast þennan vítahring er að bregðast við nógu snemma og sýna þessum líkama sem við fáum til afnota tilhlýðilega virðingu. Eitt af því sem við getum gert fyrirbyggjandi er að fara reglulega í nudd. Ekki bara þegar axlirnar eru komnar upp að eyrum og lífið er orðið tómlegt og óspennandi. Með því að fara reglulega í gott nudd búum við okkur til góðan grunn, þar sem við tökum sjálf ábyrgð á eigin heilsu og lærum að hlusta á þarfir líkamans jafnóðum svo við getum brugðist við áður en eitthvað gefur sig.

Þegar við erum utan við okkur
Stundum verðum við óhamingjusöm og vitum ekki af hverju.
Við getum verið eirðarlaus og kannski utan við okkur, förum að gleyma hlutum, hættum að vera alveg í sambandi við annað fólk og náum ekki að hvíla í því sem við erum að gera. Það er yfirleitt merki um að við séum komin úr tengslum við líkamann.

Að næra líkamann
Þegar við nærum líkamann gegn um nudd erum við að fóðra ónæmiskerfið, örva og koma jafnvægi á vökva- og orkuflæði líkamans, losa um spennta vöðva og við fyllumst af vellíðan, njótum þess að vera í líkama og vera til. Öndunin hefur líka mikið að segja í þessu sambandi. Við öndum flest of lítið og njótum lífsins þess vegna ekki til fulls. Í nuddi getur því verið gott að nota öndunina til að hjálpa okkur að tengjast líkamanum og losa um spennu.

Margar aðferðir í nuddi
Nudd býður upp á óteljandi aðferðir og nuddarar eru eins ólíkir og þeir eru margir. Þar verðum við að treysta eigin tilfinningu og innsæi og finna þann sem hentar okkur. Fyrir mér byggir nudd fyrst og fremst á tilfinningu og næmni fyrir þeim sem liggur á nuddbekknum. Tæknin kemur á eftir eins og afleiðing frekar en aðalatriði og byggir á því hverjar þarfir einstaklingsins eru. Hægt er að nýta sér nudd til að ná djúpri slökun, vinna með líkamlega þætti eins og vöðvabólgu, bakverk, höfuðverk, svefnleysi, síþreytu, meltingarvandamál, þreytu á meðgöngu, tíðaverki og tíðatruflanir svo eitthvað sé nefnt. Einnig er hægt að nota nudd til að hjálpa til við að losa um tilfinningar eins og sorg, leiða, kvíða, fæðingarþunglyndi, reiði, ótta, ótjáða gleði og ást.

Nudd sem tilfinningalosun
Líkam inn geymir allt sem hann hefur upplifað og með því að tengjast minningunni í líkamanum getum við losað um og sleppt henni. Þar finnst mér yfirleitt nauðsynlegt að tengja saman öndun og líkamsvitund. Þetta krefst mikils trausts svo að við upplifum okkur örugg og það getur tekið tíma að byggja upp slíkt traust. Einnig getur það tekið tíma að læra að hlusta á líkamann. Það er eitthvað sem verður að koma af sjálfu sér og er eins og afleiðing af því að okkur fer að finnast merkilegt að hlusta á það sem líkaminn er að segja okkur. Einfaldleikinn getur gert kraftaverk.

Við megum líka njóta lífsins
Nudd sem stundað er reglulega gerir okkur mýkri og sveigjanlegri og hæfari til að takast á við óvænta snúninga lífsins á yfirvegaðan hátt. Þegar okkur líður vel verður lífið auðveldara og ánægjulegra. Með því að sinna sjálfum okkur og taka okkur tíma bara fyrir okkur sjálf getum við sinnt vinnu okkar og okkar nánastu af meiri einbeitingu og hlýju og notið þess um leið.

Guðrún Arnalds
Sími: 896 2396
Greinarhöfundur er nuddari, hómópati og leiðbeinandi í líföndun.

til baka í fróðleik!